Gipangandaman sa Philippine Statistics Authority (PSA) Zamboanga del Norte ang pagpatuman sa 3rd Quarter Commercial and Municipal Fisheries Survey pinaagi sa usa ka adlaw nga orientation ug training nga gihimo niadtong Hulyo 7 sa Mini Conference Room sa A4M Building, Arellano Extension, Miputak, Dipolog City.
Kabahin sa maong pagpangandam ang 13 ka Statistical Researchers nga maoy mopahigayon sa survey sa nagkadaiyang municipal fish landing centers sa probinsya. Si Statistical Analyst Evelyn V. Laput, Provincial Focal Person, maoy nagsilbing resource person sa pagbansay ug mipasabot sa mga pamaagi sa tukmang pagkolekta, pagrekord, ug pagproseso sa mga datos.
Kini nga Quarterly Commercial and Municipal Fisheries Survey nagtumong sa pagkuha sa datos sa gidaghanon ug presyo sa mga isdang gipaawas sa municipal traditional fish landing centers gikan sa mga fishing boat nga adunay gross tonnage nga tulo ka tonelada paubos. Lakip usab sa tumong niini ang paghimo og kasaligang estadistika sa quarterly volume ug kantidad sa marine municipal fisheries production sumala sa matang sa isda sa lebel sa probinsya, rehiyon, ug tibuok nasud.
Ang maong survey gipatuman ubos sa Republic Act No. 10625 o ang Philippine Statistical Act of 2013, nga naghatag og mandato sa PSA sa pagkolekta, pagtipon, pag-analisar, ug pagmantala sa opisyal nga estadistika nga gamiton sa pagpalambo sa mga programa ug polisiya sa gobyerno.(IKEN B. GULLEM)
Source: PSA Zamboanga del Norte