Nakadawat og agricultural input assistance ang 124 ka mag-uuma gikan sa mga barangay sa Diwaan, Maria Uray, Antipolo ug Sulangon pinaagi sa City Government of Dapitan atol sa distribusyon nga gipahigayon sa Covered Court sa Barangay Sulangon niadtong Hunyo 25.
Gipangulohan ang kalihokan nila Mayor Evelyn “Belen” T. Uy, Vice Mayor Gabriel M. Cad, mga konsehal nga sila Dennis Tan, Bienvenido Diniay, Erasmo Bayron ug Ruel Nadela, uban ni City Agriculturist Cyril Patangan, isip kabahin sa padayon nga suporta sa lokal nga panggamhanan sa sektor sa agrikultura ug sa panginabuhian sa mga mag-uuma.
Sa wala pa ang distribusyon, gitambongan sa mga benepisyaryo ang technical briefing nga gipahigayon ni Agriculturist II Pilar A. Jamolod aron masiguro ang husto ug episyenteng paggamit sa mga gipang-apod-apod nga agricultural inputs ug mapataas ang produksiyon sa ilang mga uma.
Lakip sa gipanghatag ang 100 ka sako sa Ammonium Sulfate (21-0-0), 39 ka karton sa Humic Max Thor Organic Fertilizer, 19 ka karton sa Max Gel Foliar Fertilizer (46-0-0), ug 35 ka karton sa Fo Limec (14-14-14) Contour Foliar Fertilizer.
Gipasiugda usab sa mensahe ni Mayor Uy nga ang pagpalig-on sa sektor sa agrikultura maoy usa sa mga prayoridad sa lokal nga panggamhanan tungod kay dako kini’g ikatampo sa food security, pag-uswag sa ekonomiya ug sa kaayohan sa komunidad.(IKEN B. GULLEM)
Source: Dapitan City Government