Nadawat na sa mga non-teaching personnel ang ilang Collective Negotiation Agreement Incentive (CNAI), human gi-release sa Schools Division of Dapitan City ang insentibo, isip pagpakita sa paningkamot sa dibisyon sa paghatag bili ug pag-ila sa kontribusyon sa mga kawani sa serbisyong pang-edukasyon.
Sumala kang Ma. Perga A. Cadiente, Presidente sa DepEd Dapitan NEU Chapter, dako ang pasalamat sa mga rank-and-file employees sa top management sa DepEd Dapitan, ilabi na kang Schools Division Superintendent Jay Montealto, tungod sa paningkamot nga matuman ug mas sayo ang pag-release sa CNAI. Matod pa niya, dako kaayo ang tabang sa maong insentibo sa moral ug kadasig sa mga empleyado.
Ang CNAI resulta sa panagtambayayong tali sa Department of Education ug sa DepEd National Employees Union (DepEd NEU) ubos sa liderato ni Education Secretary Sonny Angara.
Kini gihatag isip pasidungog sa dedikasyon, kaepektibohan, ug matinud-anong serbisyo sa mga kawani sa gobyerno, nga nagpadayon sa paghatag dekalidad nga serbisyong publiko.(IKEN B. GULLEM)
Source: DepEd Tayo- Division of Dapitan City