Adunay 80 ka mga kabatan-onan ang misalmut sa Learning to Earning Pathways (LEaP!) Programme for Young People Kick-Off Activity nga gipahigayon sa Plenary Hall, Zamboanga del Norte Convention and Exhibition Center, Estaka ning dakbayan sa Dipolog, Abril 7.
Kini pinaagi usab sa koordinasyon sa kagamhanang probinsyal sa Zamboanga del Norte pinaagi sa Provincial Youth Development Council. Matud pa ni Ms. Diana Racquel Acaylar, LEaP! Area Coordinator sa Zamboanga del Norte nga ang LEaP! usa ka programa sa UNICEF Philippines ug gipatuman uban sa pagpakigtambayayong sa Ateneo Learning and Teaching Excellence Center (ALTEC) sa Ateneo de Zamboanga University (AdZU) nga nagtumong aron paghatag sa mga bansay-bansay ug kurso aron mapalambo pa ang kahanas sa mga kabatan-onang Pilipino nga anaa sa komunidad, aron mapahapsay ang ilang kaasgut sa pagpangita ug trabaho ug mahatagan sila ug kakayahan aron magmalampuson sa ilang kinabuhi.
Dugang ni Ms. Acaylar nga lakip sa katambayayong sa LEaP! Programme mao ang Department of Education (DepEd), Council for the Welfare of Children (CWC) ug National Youth Commission (NYC) alang sa tulo ka tuig nga pagpatuman sa maong programa alang sa mga kabatan-onan. Garbo sa Zamboanga del Norte tungod kay nahilakip kini sa lima lamang ka LEaP! Programme Sites dinhi sa nasud. Lakip sa laing upat nga lugar mao ang Angeles City-Pampanga, Northern Samar, Cagayan de Oro City ug Zamboanga City. Ang LEaP! Programme alang kini sa mga kabatan-onan nga nagpangidaron 15-24 anyos. (Angelica T. Obina)
SOURCE: PROV. INFORMATION CENTER (PIC)ZAMBOANGA DEL NORTE-Sheng Jumalon Bala