Mokantidad ₱9.98 milyones nga pondo ang gigahin sa Department of Science and Technology–Zamboanga del Norte (DOST-ZDN) alang sa mga proyektong motumong sa pagpauswag sa panginabuhian, malungtarong kalamboan, ug inclusive growth sa probinsya alang sa tuig 2025.
Ang pondo naglakip sa ₱3 milyones ubos sa Smart and Sustainable Communities Program (SSCP), nga nagpunting sa paggamit sa teknolohiya sa agrikultura ug limpyo nga transportasyon.
Lakip sa giaprobahan ang portable solar drying trays nga nagkantidad ug ₱1.875M, nga makatabang sa mas episyente nga post-harvest processing sa nagkalain-laing produktong agrikultural.
Gitukod usab ang C-Trike Kit Developer ug Training Center sa Dipolog School of Fisheries nga adunay ₱1.25M nga pondo aron sa pagbansay ug pilot production sa eco-friendly nga transport solutions.
Samtang, ubos sa Grants-in-Aid (GIA) Program, ₱8.54M ang gilaan alang sa mga proyekto sa Sindangan ug Liloy.
Apil niini ang village-level rice mill para sa Subanen IP community sa Sindangan ug ang planetarium sa Liloy nga magsilbing sentro sa science education.
Gipatuman usab sa Liloy ang smoked-fish ug aqua-food processing facility nga nagkantidad ug ₱3.42M aron matabangan ang mga mananagat sa pagdugang ug bili sa ilang ani.
Pinaagi niini nga mga inisyatiba, nagpadayon ang DOST sa pagdala sa “Agham na Ramdam” pinaagi sa teknolohiyang duol, mapuslanon, ug may direktang epekto sa mga komunidad sa Zamboanga del Norte.(IKEN B. GULLEM)
Source: DOST Regional Office No. IX