Gipadayon sa Gobyerno sa Lalawigan sa Sugbo ang paghatag og tabang sa mga pamilyang naapektuhan sa Bagyong Tino. Kagahapon Hulyo 13, 2026, gipangunahan ni Gobernadora Pamela Baricuatro ang pag-apod-apod sa pinansyal nga ayuda sa lungsod sa Liloan didto sa Panphil B. Frasco Memorial Sports Complex.
Ang Liloan mao ang ikaduhang lungsod nga nakadawat sa maong ayuda niadtong adlawa, sunod sa Compostela.
Kapin sa 482 ka benepisyaryo ang nakadawat og ₱10,000 matag usa isip pinansyal nga tabang gikan sa Gobyerno sa Lalawigan.
Gihatagan usab sila og 10 ka kilo nga bugas aron makatabang sa ilang panginahanglan. Ang maong ayuda alang sa mga pamilyang naapektuhan sa Bagyong Tino nga miigo sa Sugbo niadtong Nobyembre 2025.
Ang Liloan usa sa mga lungsod nga grabeng naigo sa bagyo, diin daghang balay ug kabtangan ang nadaot tungod sa kusog nga baha ug adunay mga namatay atol sa kalamidad. Nagpadayon ang lalawigan sa paghatag og suporta aron makatabang sa pagbangon sa mga apektadong pamilya.
I via Renante Socia Lada