Hulyo 14, 2026 Nagpagawas og Yellow Alert ang National Grid Corporation of the Philippines (NGCP) sa Visayas Grid karong Martes, Hulyo 14, gikan alas 5:00 sa hapon hangtod alas 8:00 sa gabii.
Base sa datos alas 8:00 sa buntag, ang available nga kuryente sa Visayas Grid anaa sa 2,590 megawatts (MW), samtang ang gilauman nga pinakataas nga konsumo o peak demand anaa sa 2,394MW.
Sumala sa NGCP, usa sa mga hinungdan sa Yellow Alert mao ang wala pagdagan sa dagkong coal power plants nga TVI 1 & 2 ug PCPC, ug ang taas nga panginahanglan sa kuryente sa maong oras.
Dugang pa, daghang power plants ang wala nag-operate o nagdagan ubos sa ilang normal nga kapasidad, hinungdan nga kapin 929MW ang wala magamit sa grid.
Ang Yellow Alert nagpasabot nga nipis na ang reserbang suplay sa kuryente aron masiguro ang normal nga operasyon sa transmission grid. Bisan pa niini, dili kini awtomatik nga nagpasabot nga adunay brownout, apan posible kini kung adunay laing power plant nga kalit nga mohunong sa operasyon.
I via Renante Socia Lada