Gipangandaman na sa Provincial Government of Zamboanga del Norte ang umaabot nga ika-292 Tzu Chi Medical Mission nga gilauman makaserbisyo sa dul-an 8,000 ka mga pasyente sa probinsya.
Gipahigayon ang coordination meeting niadtong Hunyo 24 nga gipangunahan ni Acting Provincial Administrator Charmie A. Yu uban sa mga department heads ug technical working groups aron hisgutan ang mga preparasyon sa pasilidad, logistics, emergency response ug pagdumala sa mga pasyente.
Ipahigayon ang tulo ka adlaw nga medical mission sa Agosto 6 hangtod 8 sa Dakbayan sa Dipolog diin libre nga ihatag ang general consultation, pediatric ug OB-Gyne care, ENT ug eye screening, dental services ug pipila ka surgical procedures.
Giawhag sa probinsyal nga panggamhanan ang mga pasyenteng gustong mag-avail sa serbisyo nga magpalista daan sa ilang Rural Health Unit o sa OSAC Medical Team sa Provincial Capitol aron masiguro ang hapsay ug organisadong paghatag sa medikal nga serbisyo.(JENIFFER JR. DELICA)
Source: Zamboanga del Norte Provincial News Network