Ang mga personahe sa La Libertad Municipal Police Station (MPS) pinangulohan ni Police Captain Berjohn B. Tianok, Officer-in-Charge, uban ang mga opisyales sa Barangay nga gipangulohan ni Hon. Iris P. Recentes, Barangay Chairman, mipahigayon og strong police presence activity didto sa Brgy. Carcar, La Libertad , Zamboanga del Nodte ning bag-ohay lang.
Lakip sa giapil sa kalihokan mao ang pagtukod og checkpoint operation sa mga estratehikong dapit sulod sa barangay aron masubay ang pagsulod ug paggawas sa mga sakyanan ug indibidwal. Nagpahigayon usab ang kapulisan og lecture kabahin sa pagpugong sa krimen ug personal nga kahimsog sa seguridad. Sa maong kalihokan, namahagi usab sila og infographic materials nga naglangkob sa mga mapuslanong tip kung unsaon malikayan ang walo ka focused crimes.
Gipalig-on usab ang presensya sa kapulisan pinaagi sa mobile ug motorcycle patrolling, recorrida, ug house-to-house visitation nga nagtugot kanila nga makig-uban direkta sa mga residente. Kini nakahatag og higayon aron mas mapalig-on pa ang relasyon tali sa kapulisan ug sa komunidad.
Ang maong kalihokan nagpakita sa padayon nga paningkamot sa PNP nga mapalambo ang kalinaw, kahapsay ug kasigurohan sa matag komunidad, pinaagi sa aktibong pakigtambayayong sa mga barangay opisyales ug mga residente.(Jumalisa Papa)
Source: La Libertad MPS