Nagmalampuson ug walay kakulian ang unang adlaw sa pag-abli sa klase sa probinsya sa Sarangani kung diin kagahapong adlawa usab gihinumdum ang World Teachers’ Day. Segun ni Sarangani Province Schools Division Superintendent/SDS Gildo Mosqueda, may mga hagit man sila nga nasinatian sa modular modality apan sa pagtinabangay matud pa sa mga magtutudlo, sitio ug barangay officials ug sa mga ginikanan, malampuson gihapon silang nakapadangat og mga printed material.
Sama sa gibuhat sa Kling, Kiamba sa liderato ni Barangay Kapitan Michael Chiongbian nga sa barangay hall na gipanguha sa mga ginikanan ang mga self-learning module. Sa barangay hall kuhaon ug didto napud kolektahon. Katugbang usab sa mga magtutudlo sa Pinol, boundary barangay sa Maitum, sa pag-distribute sa mga module ang mga personahe sa 2nd Sarangani Provincial Mobile Force Company sa grupo nila Assistant Team Leader Police Corporal Elizar Sapocado Jr. sa superbisyon ni Major Canieso Golwingon.
Samtang, nakig-partner ang DepEd Sarangani sa mga istasyon sa radyo alang sa blended education. Mao usab kini ang plastada sa FM station nga gipanag-iyahan sa Tamban National High School sa pagdumala nila Principal Marvin Lim ug Assistant Principal Boy Vigafria, naka-basi sa Barangay Tamban, Malungon, Sarangani Province, ang 104.5 Tamban FM.
Walay laing madunggan tibuok adlaw sa Tamban FM kundili ang lecture sa mga magtutudlo aron masabtan pa sa mga estudyante matag grade level ang madawat nila nga mga module. Suportado ang Tamban FM sa mga residente, Sangguniang Kabataan, barangay council nila Kapitan Asgapo, ug nila Governor Steve Chiongbian Solon ug Malungon Mayor Tessa Constantino.
Ilalum sa Sulong Karunungan program ni Governor Solon, mukabat sa ₱ 14 Milyon ka pesos ang pasiunang ayuda sa Kapitolyo ngadto sa DepEd Sarangani gikan sa pondo sa Special Education Fund ug sa regular fund sa probinsya.
(Provincial Information Office – Sarangani)