Kiniddaw ni Laoag City Mayor Michael Marcos Keon kadagiti barangay chairman iti suidad ti naiget nga implementasion ti Waste Segregation kadagiti masakupan da a barangay.
Naibagana daytoy bayat iti City Development Council Meeting nga inatendaran dagiti barangay chairman.
Masapul kunana ti panagtinnulong ti City Government ken ti barangay a manitoren a nalaing ti implimentasion ti ‘’no segregation, no collection policy’’ kas panangsurot ti Republic Act No. 9003 wenno ecological solid waste management.
Gapu iti kaawan ti pagbasuraan wenno masapulan a lote a bukod nga pagbasuraan dagiti Poblacion barangay para kadagiti ‘’nabubulok’’, kolektaren daytoy ti city government ngem nasken a masurot ti waste segregation kas kuma ti nabubulok ken di-nabubulok.
Iyimplimentar pay ti City Government ti house to house collection ti basura iti poblacion barangay.
Namunganay daytoy gapu iti saan a pannakasurot a nalaing ti panagipan ti basura kadagiti pick-up centers.
Malaksid dayta, adda payen ti sound system nga agsursur tapno mapakaamuan dagiti bumarangay nga orasnan ti panagkolekta ti basura
Babaen pay ti house to house collection, Makita no siasino dagiti sumursurot ti husto a waste segregation ken gundaway payen a mabagaan dagiti bumarangay.
Patien ti Mayor nga agballaygi daytoy nga adding babaen met laeng ti disiplina ken kooperasion ti tunggal maysa. (OIC Rodrigo G. Sadian, RPN DZRLÂ Batac)
(Source: LGU – Laoag City)
