DAVAO CITY – Patay ang usa ka sundalo ug tulo ka miyembro sa New People’s Army (NPA), lakip ang duha ka lider, sa usa ka armadong engkwentro nga nahitabo sa Barangay Datu Ito Andong, alas 3:00 sa kadlawon, Huwebes, Hunyo 19, 2025.
Ang mga napatay giila nga mga miyembro sa NPA Sub-Regional Committee (SRC) – Daguma, nga sakop sa Far South Mindanao Region. Lakip sa ilang napatay mao si Eusivio Cranzo alyas Agaw/Brix, giingong lider sa grupo.
Sumala ni Lt. Col. Christopherson Capuyan, commander sa 37th Infantry Battalion, nahitabo ang engkwentro samtang nagpahigayon ang ilang tropa og decisive military operation batok sa presensya sa rebeldeng grupo sa maong lugar.
Gawas sa mga napatay, narekober sa militar ang tulo ka M16 rifles, daghang magazines, mga bala ug personal nga kagamitan gikan sa encounter site.
Padayon ang clearing operations ug pursuit missions sa lugar aron masiguro ang kalinaw ug kaluwasan sa mga sibilyan. (Camille Santos Naraga)(Source: Contributed)