Davao Oriental – Patay ang usa ka security guard human gipusil sa wala mailhing suspetsado sa Purok Rosas, Barangay Sainz sa Mati City, Huwebes sa gabii, Hunyo 19, 2025.
Giila ang biktima nga si alyas Raffy, 40-anyos, residente sa Purok Mabuhay, Barangay Sainz ug nagtrabaho isip gwardya sa Mati Polytechnic College.
Base sa paunang imbestigasyon, paingon na unta ang biktima sa iyang duty sa eskwelahan sa dihang kalit siyang gipusil sa daplin sa dalan. Dayon kining naigo ug nawad-an og kinabuhi sa lugar mismo sa insidente.
Padayon pa ang imbestigasyon sa kapulisan aron matumbok ang pagkatawo sa suspetsado ug ang motibo sa pagpamusil. Hinaut nga ang publiko motabang sa pagpahibalo og impormasyon nga makapauswag sa kaso. (Camille Santos Naraga)(Source: Contributed)