Opisyal nang giablihan ang unang Ka’aNiYogan Festival inubanan sa pagsaulog sa ika-60 nga Adlaw sa Tarragona pinaagi sa usa ka malampusong opening program nga gitambongan sa mga lider, bisita, ug mga lumulupyo sa lungsod.
Sa iyang mensahe, gipasalamatan ni Mayor Kaka Bulaong ang padayon nga suporta ug pagsalig sa katawhan ngadto sa iyang administrasyon. Gipasiugda usab niya ang importansya sa panaghiusa isip pundasyon sa padayon nga kalamboan sa Tarragona ug giabiabi ang tanan sa pagsaulog sa maong kasaulogan.
Nagpahayag usab og suporta si District 1 Board Member Anna Cheryl N. Castro, nga mipadayag sa iyang padayon nga pagpaluyo sa mga programa sa lokal nga kagamhanan sa Tarragona ug sa kalampusan sa unang Ka’aNiYogan Festival.
Mas napasidlak pa ang maong kalihokan pinaagi sa espesyal nga pasundayag ni Mindanao-based singer-songwriter Maan Chua, nga nailhan sa iyang mga awit nga “Itadyak (Mindanao),” “Kada Kadayawan,” “Sayaw,” ug uban pang mga kanta nga nagpakita sa dato nga kultura ug espiritu sa Mindanao.
Ang unang Ka’aNiYogan Festival kabahin sa selebrasyon sa ika-60 nga anibersaryo sa Tarragona ug gilauman nga mahimong usa ka bag-ong tradisyon nga magpasiugda sa kultura, turismo, ug panaghiusa sa katawhan.(Camille Santos Naraga)(Source: Contributed)