Malampusong gipagawas pag-usab sa ilang natural nga pinuy-anan ang tulo ka Philippine tarsiers nga naluwas sa Alabel, Sarangani niadtong Hulyo 14 pinaagi sa Department of Environment and Natural Resources–Provincial Environment and Natural Resources Office (DENR-PENRO) Sarangani.
Ang tulo ka tarsiers nakit-an sa daplin sa suba nila Jackyben ug Elizabeth Mangalon, kinsa maoy miluwas niini gikan sa posibleng pagbaha. Human sa ilang pagresponde, ilang gitugyan ang mga mananap sa DENR alang sa hustong pag-atiman ug ebalwasyon.
Base sa veterinary assessment, nasuta nga himsog ug walay naangkon nga kadaot ang mga tarsiers. Tungod niini, gilayon silang gipagawas balik sa usa ka angay nga lasang aron makapadayon sa ilang kinabuhi sa iilang natural nga habitat.
Samtang, gipahinumdoman sa DENR ang publiko nga gidili ang pagdakop, pagpanag-iya, pagdala, ug pagbaligya sa wildlife nga walay tukmang permit subay sa Wildlife Resources Conservation and Protection Act o Republic Act 9147.
Giawhag usab sa ahensya ang mga residente nga kon makakita o makaluwas og ihalas nga mananap, ipahibalo dayon kini sa labing duol nga opisina sa DENR aron masiguro ang husto ug luwas nga pagdumala niini.(Camille Santos Naraga)(Source:DENR Soccsksargen)