Nagpagawas og Yellow Alert ang National Grid Corporation of the Philippines (NGCP) sa Visayas Grid karong Hulyo 16, 2026, nga ipatuman gikan sa alas 6:00 sa gabii hangtod alas 7:00 sa gabii.
Base sa advisory, ang available capacity sa kuryente anaa sa 2,756 megawatts (MW) samtang ang gipaabot nga peak demand moabot sa 2,496MW.
Sumala sa NGCP, adunay 25 ka planta nga wala nag-operate tungod sa forced outage sa nagkalain-laing panahon, samtang 18 pa ka planta ang nagdagan apan ubos sa ilang normal nga kapasidad. Tungod niini, mokabat sa 785.9MW ang dili magamit nga suplay sa kuryente sa Visayas Grid.
Ang duha ka nag-unang hinungdan sa pagdeklarar sa Yellow Alert mao ang pagka-undang sa operasyon sa dagkong coal power plants nga TVI 1 ug TVI 2, ug ang taas nga gipaabot nga panginahanglan sa kuryente.
Gipasabot sa NGCP nga ang Yellow Alert nagpasabot nga nipis na ang reserbang suplay sa kuryente aron makatubag sa posibleng kalit nga problema sa transmission grid. Bisan pa, dili kini awtomatik nga nagpasabot nga adunay brownout, apan nagpasidaan kini nga limitado ang reserbang kuryente sa maong oras.
I via Renante Socia Lada