TAGUM CITY – Nasikop sa kapulisan ang tulo ka lalaki human masakpan sa giingong pagpangawat og mga scrap metal gikan sa usa ka balay sa Barangay La Filipina, Tagum City, gabii sa Mayo 27, 2026.
Giila ang mga nadakpan nga sila alyas “Edwito,” 40 anyos, live-in partner; alyas “Florencio,” 32 anyos, minyo; ug alyas “Anthony,” 25 anyos, single. Ang tulo pawang residente sa Purok Vipatel, Barangay Magugpo West, Tagum City.
Base sa report sa Tagum City Police Station, alas 6:30 sa gabii dihang gi-endorso sa mga personahe sa Mobile Patrol 726 ang mga suspetsado ngadto sa estasyon uban sa witness nga si alyas “JERRY,” 49 anyos, caretaker ug residente sa Purok 7, Barangay La Filipina.
Sa inisyal nga imbestigasyon, nasakpan sa akto sa witness ang mga suspetsado samtang nagkuha og mga scrap metal gikan sa balay ni alyas “Reynaldo” nga nahimutang sa Purok 7, Barangay La Filipina, alas 6:00 sa gabii sa maong petsa.
Ang mga suspetsado anaa karon sa kustodiya sa Tagum City Police Station samtang giandam ang mga dokumento alang sa pagpasaka sa tukmang kaso batok kanila. (Camille Santos Naraga)(Source: Contributed)