DAVAO CITY – Nadakpan sa mga personahe sa Buhangin Police Station ang duha ka lalaki atol sa buy-bust operation nga gihigayon niadtong Mayo 26, 2026, sa Davao City.
Giila ang mga nadakpan pinaagi sa ilang mga alyas nga “JAY” ug “R,” nga nasikop sa Purok 9, Lower Madapo ug Purok 10-B Marikit Compound, Barangay 8-A ning dakbayan.
Base sa report, nasakmit gikan sa mga suspetsado ang usa ka sachet sa gidudahang shabu nga gigamit isip buy-bust item ug tulo pa ka sachet sa gidudahang ilegal nga droga. Narekober usab gikan kanila ang usa ka caliber .22 nga armas.
Sumala sa kapulisan, ang kinatibuk-ang kantidad sa nakompiska nga gidudahang shabu miabot og kapin P219,572.
Ang duha ka suspetsado anaa na karon sa kustodiya sa kapulisan samtang giandam ang pagpasaka sa kasong paglapas sa Republic Act 9165 o Comprehensive Dangerous Drugs Act of 2002 ug Republic Act 10591 o Comprehensive Firearms and Ammunition Regulation Act. (Camille Santos Naraga)(Source: Contributed)