Davao de Oro — Nababag ang dagan sa trapiko sa National Highway sa Km. 67, Barangay Tuboran, Mawab, Davao de Oro human mawad-an og kontrol ang usa ka trailer truck ug nahulog sa dakung kanal sa kilid sa kalsada bandang alas 4:00 sa hapon, Disyembre 26.
Sumala sa Municipal Disaster Risk Reduction and Management Office (MDRRMO) sa Mawab, padulong unta sa Davao City ang maong trailer truck dihang nahitabo ang disgrasya sa pa-kurba nga bahin sa kalsada.
Tungod sa posisyon sa trak, duha ka lane sa highway ang naokupa niini, hinungdan nga mikunhod ug mikahinay ang dagan sa mga sakyanan, ilabina kadtong padulong sa Tagum City.
Sa kasamtangan, walay gi-report nga adunay naangul o nadamay nga laing sakyanan sa maong insidente. Padayon ang koordinasyon sa lokal nga mga awtoridad aron mapahawa dayon ang trak ug mabalik sa normal ang dagan sa trapiko sa maong dapit.(Camille Santos Naraga)(Source: Contributed)