DAVAO CITY – ARESTADO na sa kapulisan sa Valencia City si Marlon Rosaut, ang suspek sa pagpatay kang Jennifer Encarnacion sa Valencia City, Bukidnon.
Naaresto ang 38-anyos nga suspek sa Sitio Buco, Barangay Banlag, human sa koordinasyon tali sa Valencia City Police ug mga lider sa tribu sa maong lugar.
Si Rosaut usa ka manapasay og tubo ug residente sa maong barangay.
Sumala sa kapulisan, giangkon sa suspek ang krimen, apan wala siya motumbok og klarong motibo sa iyang gibuhat.
Gipadayag usab sa mga otoridad nga bag-o lang nakagawas sa prisohan si Rosaut, diin siyam (9) ka tuig siyang napriso tungod sa kasong pagpatay sa anak sa iyang live-in partner kaniadto.
Kahinumduman nga nakit-an ang biktima nga patay ug gipugotan sa ulo sa Barangay Dagat Ki-Davao, Valencia City, nga nagpatunghag kahadlok ug kabalaka sa mga residente sa lugar.
Padayon pa ang lawom nga imbestigasyon sa kapulisan.(Camille Santos Naraga)(Source: Contributed)