DAVAO CITY – Gilayong gidala sa Davao Adventist Hospital ang biktima nga giila sa ngalan nga “Afraz,” 29 anyos, usa ka negosyante ug residente sa Purok 14, Barangay Ula, Tugbok District, Davao City, human pusilon sa riding-in-tandem.
Sumala sa imbestigasyon sa kapulisan, gikan sa usa ka barber shop sulod sa ilang subdivision ang biktima ug samtang naa na sulod sa iyang sakyanan, giduolan siya sa duha ka armadong lalaki nga sakay og motorsiklo ug gipusil og tulo ka beses.
Matud pa sa pulisya, sa dihang nadungog sa biktima ang mga lupok sa pusil, nakalihok pa siya ug mibalin sa tuo nga lingkoranan sa iyang sakyanan, apan gipusil gihapon siya sa mga suspek sa wala pa kini paspas nga mitakas padulong sa direksiyon sa Barangay Ula.
Nakaangkon ang biktima og duha ka tama sa bala sa likod ug usa sa wala nga abaga, ug nagpatabang sa iyang empleyado aron madali siyang madala sa ospital.
Nakakuha ang kapulisan og tulo ka basiyo sa bala sa .45 caliber nga pusil sa crime scene, samtang padayon pang giimbestigahan ang motibo sa maong pagpamusil. (Camille Santos Naraga)(Source: Contributed)