Nasikop sa mga operatiba sa Sta. Ana Police Station (PS1) sa Davao City Police Office (DCPO) ang usa ka lalaki atol sa operasyon batok sa ilegal nga droga nga misangpot usab sa pagkarekober sa gituohang shabu sa Davao City.
Ang nadakpan giila nga si Jamal Abdul Caragao Paniambaan, nga giakusahan og paglapas sa Section 11 sa Republic Act No. 9165 o ang Comprehensive Dangerous Drugs Act of 2002.
Base sa report sa DCPO, ang operasyon gipangulohan ni PMAJ Marc Hedssel Culaste, Station Commander sa Sta. Ana Police Station.
Narekober gikan sa suspek ang gibanabanang 1.4 gramos sa gituohang shabu nga adunay standard drug price nga ₱9,520.
Gikustodiya na sa kapulisan ang suspek samtang gipadayon ang pagproseso sa kasong ipasaka batok kaniya. Ang nakumpiskang gidudahang shabu ipailalom usab sa laboratory examination isip kabahin sa imbestigasyon.
Gipadayon sa DCPO ang ilang kampanya batok sa ilegal nga droga ug gi-awhag ang publiko nga magtinabangay pinaagi sa pagreport sa mga iligal nga kalihokan sa ilang komunidad.(Camille Santos Naraga)(Source: DCPO)