Gibuwag sa mga operatiba sa Philippine Drug Enforcement Agency (PDEA) Region 11 ang usa ka gituohang drug den sa Purok Manga, Barangay Macangao, Lupon, Davao Oriental, nga misangpot sa pagdakop sa tulo ka gidudahang drug personalities atol sa joint buy-bust operation niadtong Hulyo 9, 2026.
Ang mga nadakpan giila sa mga alyas “Naldo,” 49 anyos ug gituohang maintainer sa drug den; “Jol,” nga gituohang empleyado sa maong lugar; ug “Cathy,” nga giingong bisita sa dihang gihimo ang operasyon.
Sumala sa PDEA, narekober sa operasyon ang gibanabanang 11 gramos sa gituohang shabu nga adunay kantidad nga ₱74,800, 50 gramos sa pinaugang marijuana nga nagkantidad og ₱6,000, lain-laing drug paraphernalia, ug ang marked buy-bust money nga gigamit sa buy-bust operation.
Gidala dayon sa kustodiya sa PDEA ang tulo ka mga suspetsado alang sa hustong dokumentasyon ug pagproseso sa mga ebidensya.
Gipasakaan na sila og kasong paglapas sa Republic Act No. 9165 o ang Comprehensive Dangerous Drugs Act of 2002. Samtang, nagpadayon ang imbestigasyon sa mga awtoridad aron matino kung adunay uban pang nalambigit sa ilegal nga operasyon sa maong gituohang drug den.(Camille Santos Naraga)(Source: PDEA Region 11)