Gipahigayon karong adlawa, Hunyo 19, 2025, ang pormal nga pag-abli sa bag-ong modernong Regional Command Center sa Police Regional Office 7 (PRO7) sulod sa Camp Sergio Osmeña Sr., Cebu City.
Kini nga proyekto usa ka nag-unang inisyatiba ni PBGEN Redrico A. Maranan, Regional Director sa PRO7, aron suportahan ang kamaduan sa Chief PNP nga mapa-ubos ang response time sa 3 hangtod 5 minutos sa mga emerhensiya gamit ang teknolohiya ug moderno nga pamaagi. Usa usab kini ka lakang alang sa tukma nga paggamit sa 911 emergency hotline sa tibuok nasud.
Nahimutang sa sulod sa Regional Operations Center, ang command center adunay abilidad sa real-time monitoring, paspas nga pag-analisar sa sitwasyon, ug han-ay nga pag-deploy sa mga kapulisan sa rehiyon. Usa kini ka dako’ng suporta sa pagpalig-on sa seguridad sa Central Visayas.
Aron ipakita ang kapasidad sa pasilidad, naglusad ang PRO7 og simulation exercise diin gipakita ang pagdawat ug pagproseso sa emergency calls, ug ang dali nga koordinasyon sa mga police unit nga nakaresulta sa hapsay ug dali nga aksyon.
Ang Command Center karon mao na ang sentro sa emergency coordination ug 911 responses sa Central Visayas. Mas gipadali niini ang komunikasyon, surveillance, ug deployment sa mga police personnel, ug usa kini ka dakong kalampusan sa padayon nga modernization sa public safety system sa rehiyon.
Source: PRO7
I via Renante Socia Lada