Davao City – Giklaro sa Police Regional Office 11 (PRO XI) nga bakak o “fake news” ang migawas nga impormasyon nga gi-raid kuno ang balay ni kanhi Presidente Rodrigo Duterte sa Davao City.
Matod ni PRO XI Regional Director Police Brigadier General Leon Victor Rosete, walay kamatuoran ang maong pasangil nga gi-raid ang panimalay ni Duterte sa Doña Luisa Subdivision, Ecoland.
Suma pa ni PBGen. Rosete, iyang nakigsulti mismo sa mga opisyal sa Criminal Investigation and Detection Group (CIDG) ug Special Action Force (SAF), ug giingon nga wala silay bisan unsang pending nga operasyon nga naglambigit sa maong panimalay.
Gisugdan na usab ang imbestigasyon aron masuta ang gigikanan sa maong sayop nga impormasyon.
Nagpahimangno ang PRO XI batok sa pagpakatag og dili tinuod nga balita online. Gibutyag sa buhatan nga ang tuyo nga pagpakatag og bakak nga impormasyon usa ka seryosong kalapasan ubos sa Republic Act 10175 o Anti-Cybercrime Law.(Camille SAntos Naraga)(Source: Contributed)