Misaka na sa 61 ang gidaghanon sa mga namatay tungod sa pananalasa sa kalamidad sa pipila ka bahin sa Mindanao, sumala sa Office of Civil Defense (OCD).
Matod ni OCD Assistant Secretary Bernardo Rafaelito “Raffy” Alejandro IV, niabot usab sa 33 ang gidaghanon sa mga tawo nga wala pa makit-i hangtod ning buntaga.
Kadaghanan sa mga missing persons gikan sa mga lungsod sa Jose Abad Santos sa Davao Occidental ug Glan sa Sarangani, nga lakip sa mga lugar nga grabeng naapektuhan sa mga pagdahili sa yuta (landslide).
Padayon sa pagkakaron ang search, rescue, ug retrieval operations nga gipahigayon sa mga otoridad sa mga apektadong lugar aron pangitaon ang mga nawala ug mahatagan og tabang ang mga residente nga naapektuhan sa maong kalamidad.
Gipadayon usab sa mga kinauukulang ahensya ang pagmonitor sa kahimtang sa mga komunidad ug ang paghatag og ayuda sa mga biktima samtang nagpadayon ang mga operasyon sa pagbangon gikan sa sakuna.(Camille Santos Naraga)(Source: Contributed)