Naghatod og init nga pagkaon ug nagkalainlaing serbisyong panglawas ang Philippine Red Cross (PRC) ngadto sa mga evacuee nga nagpabilin sa Libi Integrated School Evacuation Center sa Malapatan, Sarangani niadtong Hunyo 13, 2026.
Lakip sa mga serbisyong gihatag ang medical consultations, blood sugar testing, ug mga lecture bahin sa paglikay sa ubo, sip-on, ug dengue. Nagpahigayon usab ang PRC og handwashing demonstrations, Psychological First Aid alang sa mga residente nga naapektuhan, ug nag-abli og Child-Friendly Space aron adunay luwas nga lugar alang sa mga kabataan.
Sumala sa PRC, ang maong operasyon nahimong posible pinaagi sa pakigtambayayong sa ilang mga boluntaryo ug sa Barangay Local Government Unit sa Libi aron masiguro ang kaluwasan, panglawas, ug kaayohan sa mga evacuee.
Padayon ang paghatag sa Philippine Red Cross og humanitarian assistance ngadto sa mga komunidad nga naapektuhan sa kalamidad samtang nagkinahanglan pa og suporta ang mga residente.(Camille Santos Naraga)(Source: Contributed)