DAVAO CITY – Nasakmit sa mga otoridad ang giingong smuggled nga sigarilyo, iligal nga droga, ug armas nga nagkantidad og P8.6 milyon atol sa operasyon sa usa ka bodega sa Purok 19, Cabanes Road, Barangay Ilang niadtong Huwebes sa gabii, Hulyo 3, 2025.
Gipahigayon ang operasyon base sa intel report, apan nakasibat ang giingong tagdumala sa warehouse nga giila sa alyas “Jom.” Sa iyang pag-ikyas, nabilin ang usa ka itom nga sling bag nga sulod ang usa ka Armscor .45 caliber pistol nga adunay usa ka magazine nga may sulod nga pito ka bala. Nakaplagan usab ang duha ka sachet sa gituohang shabu, nga gitantiya og kantidad nga P5,000.
Nakuha sa mga otoridad ang 431 ka master cases sa mga smuggled nga sigarilyo sulod sa bodega, nga gitugyan na sa Bureau of Customs – Port of Davao alang sa pormal nga imbentaryo ug imbestigasyon.
Samtang, ang nakuha nga armas ug iligal nga droga gikuhaan na og dokumento ug anaa na sa kustodiya sa kapulisan isip ebidensya alang sa mga kasong ipasaka batok sa nakasibat nga suspek.(Camille Santos Naraga)(Source: Contributed)