Siyam ka mga Chinese nationals ang nadakpan sa mga sakop sa Criminal Investigation and Detection Group (CIDG)–Mandaue City Field Unit human masakpan nga nagpadagan og giingong scam hub o POGO (Philippine Offshore Gaming Operator) sulod sa usa ka subdivision sa Barangay Alang-Alang, Mandaue City.
Ang operasyon gisugdan base sa reklamo sa usa ka 23-anyos nga Pinay nga nagtrabaho sa maong lugar. Sumala sa biktima, sila gikulata og gipuhos nga magtrabaho ug gidili nga mogawas sa balay diin sila gi-assign. Tungod niini, gilusad sa CIDG ang “Oplan Olea” uban sa Mandaue City Police, Regional Anti-Cybercrime Unit 7, ug DSWD 7, sa alas 10:30 sa gabii, Hulyo 2, 2025.
Sa pagsulod sa balay, lima sa mga Chinese nationals misulay og ikyas pinaagi sa paglukso gikan sa ikaduhang andana. Usa kanila naangol ug nabali ang kamot ug bitiis, ug kasamtangang gitambalan sa usa ka pribadong ospital sa Cebu City. Ang uban nga upat karon anaa na sa kustodiya sa CIDG 7.
Matod ni Police Lt. Col. Jerick Filosofo nga lisod ang imbestigasyon tungod kay dili mo kooperar ang mga nadakpan. Ang ilang mga ID nga gi-presentar peke ug gamit ang mga ngalan sa mga Pilipino, samtang walay nakit-ang passport o opisyal nga dokumento. Ang CIDG karon nakigkoordinar na sa Bureau of Immigration aron ma-verify ang ilang pagkatawo ug andam nang mosang-at og kasong human trafficking.
Narekober sa operasyon ang 40 ka cellphone, usa ka tablet, ug 12 ka computer sets nga ipailawom pa sa forensic examination. Apan giingon ni Filosofo nga magkuha pa sila og court-issued search warrant aron legal nga ma-access ang sulod sa mga gadget. Nanghinaut ang CIDG nga ang katawhan magmatngon ug motaho dayon sa mga kadudahang kalihukan sa ilang lugar aron mapadayon ang kampanya batok sa ilegal nga mga aktibidad sa nasud.
I via Renante Socia Lada