Mipahibalo ang Northern Davao Electric Cooperative nga mosunod kini sa mando sa Energy Regulatory Commission (ERC) kalabot sa pagbalhin sa operasyon sa power distribution sa pipila ka mga lugar sa Davao del Norte. Apan, gipatin-aw sa kooperatiba nga ipadayon gihapon niini ang legal nga mga lakang samtang naghulat sa pinal nga resolusyon sa kaso.
Niadtong Hulyo 3, gimando sa ERC ang NORDECO nga tumanon ang mga naglungtad nga kautusan sa korte may kalabotan sa franchise transition sa Tagum, Asuncion, Kapalong, New Corella, ug Talaingod.
Samtang, gipahibalo sa Davao Light and Power Company nga andam kini sa pagpadayon sa rehabilitasyon ug pagpaayo sa mga pasilidad sa power distribution sa maong mga lugar.
Bisan pa sa nagpadayong legal nga panaglalis, gipasalig sa duha ka panig nga ilang paningkamotan ang pagmintinar sa padayon ug kasaligan nga suplay sa kuryente alang sa mga konsumidor sa Davao del Norte.
Padayon usab nga gimonitor sa ERC ang hapsay nga pagpatuman sa proseso sa franchise transition. .(Camille Santos Naraga)(Source: Contributed)