Napulo ka tawo ang naangol sa usa ka aksidente nga nahitabo sa C.P. Garcia Highway sa Panacan, Davao City, human mibuto ang atubangang ligid sa usa ka pampasaherong bus alas 11:39 sa gabii niadtong Hunyo 20, 2026.
Sumala sa kapolisan, padulong unta sa Butuan City ang Metro Shuttle bus nga may sakay nga 58 ka pasahero sa dihang kalit mibuto ang usa sa mga ligid niini. Tungod sa kusog nga impact, nawad-an og kontrol ang drayber ug misangko ang bus sa center island.
Naapektuhan usab sa insidente ang usa ka Suzuki FV110 nga motorsiklo nga naigo sa mga tipik o debris gikan sa mibutong ligid. Nakatagak ang drayber sa motorsiklo ug nakaangkon og mga samad.
Ang mga biktima gidala dayon sa mga pasilidad medikal alang sa hustong pag-atiman, samtang ang drayber sa motorsiklo gidala sa Southern Philippines Medical Center.
Nagpadayon ang imbestigasyon sa kapolisan aron masuta ang eksaktong hinungdan sa insidente ug aron malikayan ang susamang panghitabo sa umaabot.(Camille Santos Naraga)(Source: DCPO PIO)