Davao City — Patay na dihang naabtan sa mga personahe sa 911 Emergency Response ug sa Traffic Enforcement Unit (TEU) ang driver sa motorsiklo nga giilang Manolito Abella Jr., 29 anyos, residente sa Rivera St., Lagao, General Santos City, human sa banggaan tali sa usa ka motor ug truck.
Sumala sa kapulisan, bandang alas 3:19 sa kaadlawon padulong sa Banaybanay, Davao Oriental ang truck sa dihang hinay-hinay kining mikabig pawala aron mosulod sa usa ka gasolinahan nga nahimutang atbang sa KOJC. Niining higayona, kalit umanong mibangga ang motor nga gihulagway nga nagpadagan og kusog ug gimaneho sa biktima.
Base sa sulti sa radio broadcaster nga si Sammy Baug, nga nakalabay sa maong dapit atol sa insidente, gisaysay sa truck driver nga si Francisco Miano nga ang motorsiklo gikan sa kanto Panacan padulong sa Buhangin nga rota ug wala kini naka-on nga headlight sa dihang nahitabo ang banggaan.
Padayon pang giimbestigahan sa mga awtoridad ang insidente aron mahibal-an ang tinuod nga hinungdan sa aksidente. (Camille Santos Naraga)(Source: Contributed)