Davao City — Gidayeg ni Mindanao Development Authority (MinDA) Secretary Leo Tereso Magno ang Department of Migrant Workers (DMW) sa pagdala sa ilang mga serbisyo gawas sa Metro Manila, nga iyang gitawag nga konkretong lakang aron masiguro nga dili mapabilin o makalimtan ang mga Overseas Filipino Workers (OFWs).
Ang pahayag gihimo ni Magno atol sa paglunsad sa OFW Airport Lounge sa Davao International Airport niadtong Disyembre 23, 2025. Matod niya, ang inisyatiba usa ka pag-ila sa kapin sa 300,000 ka Mindanaoan OFWs nga dugay nang giila isip mga bayani ug angay makadawat og dugang nga pag-atiman ug pagtagad.
Sumala pa kang Magno, ang proyekto kabahin sa adyenda sa administrasyon ni Presidente Ferdinand Marcos Jr. sa pagpalig-on sa mga frontline services pinaagi sa whole-of-government approach, aron mahimong mas duol, makatao, ug may dignidad ang paghatag og tabang sa mga OFW—ilabina sa emosyonal nga mga higayon sa ilang pagbiyahe ug pagpauli.
Ang OFW Airport Lounge sa Davao City nagtanyag og komportableng lingkoranan, libre nga pagkaon ug kape, real-time flight updates, ug access sa nagkalain-laing government assistance desks alang sa mga OFW.
Ang maong pasilidad mao ang unang OFW Airport Lounge gawas sa Luzon, ug gitan-aw usab sa DMW ang posibilidad sa pagtukod og susamang mga pasilidad sa Cebu ug sa ubang mga siyudad nga adunay international routes. (Camille Santos Naraga)(Source: Contributed)