Davao Oriental (Oktubre 12) — Miabot na sa Matiao Warehouse sa Mati City ang mga ready-to-eat food packs gikan sa Department of Social Welfare and Development (DSWD)–Davao Region aron tabangan ang mga residente nga naapektuhan sa bag-ong “doublet earthquake.”
Ang mga food packs, nga gi-deliver niadtong Domingo, Oktubre 12, ipanghatag sa mga pamilya nga naapektuhan ang ilang mga panimalay ug panginabuhian tungod sa duha ka kusog nga linog nga miigo sa pipila ka bahin sa Davao Oriental niadtong Oktubre 10.
Sumala sa DSWD-11, kabahin kini sa nagpadayong relief operations sa ahensya aron masiguro nga ang mga komunidad nga naapektuhan sa linog makadawat dayon ug tabang, ilabi na kadtong mga napugos nga mabiya sa ilang mga balay o wala nay access sa mga suplay nga panginahanglan.
Ang mga lokal nga opisyal, kauban ang mga personnel sa DSWD sa field, nagahimo karon og koordinasyon aron ma-finalize ang iskedyul sa pagpanghatag sa mga ayuda ug masiguro nga kini mahatod dayon sa mga lugar nga pinakagrabe ang kadaut.(Camille Santos Naraga)(Source: Contributed)