Pipila ka Persons Deprived of Liberty (PDLs) sa Davao del Norte Provincial Rehabilitation Center (DPRC) ang malampusong nakatapos sa Alternative Learning System (ALS) Program atol sa Graduation Rites ug Moving-up Ceremony alang sa Class of 2025–2026 nga gipahigayon niadtong Hulyo 24, 2026.
Ang seremonya gitambongan ni Provincial Warden Juaren V. Matulac, uban ni Provincial Administrator Ralph P. Dela Cruz, LT. COL., PA (Ret.), nga nagsilbing guest speaker. Sa iyang mensahe, iyang gipasiugda nga ang edukasyon usa sa labing epektibong paagi aron matabangan ang mga PDL nga makausab sa ilang kinabuhi ug makapagsugod pag-usab sa hustong dalan.
Gipasalamatan usab sa DPRC ang Schools Division of Davao del Norte pinaagi ni Dr. Lordelyn A. Buyo ug si ALS Instructor Liza Mae Ale, LPT, tungod sa ilang padayon nga suporta ug dedikasyon sa paghatag og kalidad nga edukasyon sa mga PDL.
Matud sa DPRC, ang maong programa kabahin sa ilang rehabilitasyon ug reintegration efforts aron mahatagan ang mga PDL og mas maayong oportunidad sa ilang pagbalik sa komunidad.(Camille Santos Naraga)(Source: Davao del Norte Provincial Rehabilitation Center)