DAVAO CITY – Narekober sa mga pulis ang nagkalain-laing matang sa firecracker nga gibiyaan sa Sasa Public Market, Kilometer 11, Barangay Sasa, Davao City, niadtong gabii sa Disyembre 31, 2025. Ang mga firecracker karon anaa na sa kustodiya sa Sasa Police Station 4.
Sumala sa report sa kapulisan, nagpatrolya lamang ang mga awtoridad sa ilang area of responsibility dihang ilang namatikdan ang usa ka plastic cellophane nga gituohang gibiyaan sa usa ka lalaki nga kalit lang mibiya sa lugar human makamatikod sa presensya sa mga pulis.
Nakaplagan sulod sa plastic cellophane ang 860 ka pirasong sparkler, lima (5) ka gagmayng fountain, tulo (3) ka corsair, lima (5) ka trompillo, ug napulo (10) ka pailaw.
Matud pa sa kapulisan, gibanabana nga ₱3,455 ang kinatibuk-ang bili sa mga nakumpiskang firecracker.
Gipahinumdoman sa mga awtoridad ang publiko nga hugot nga gidili ang pagbaligya ug pagpabuto sa firecracker ug pyrotechnics sa Davao City, subay sa firecracker ban nga ginapatuman na sulod sa 23 ka tuig.(Camille Santos Naraga)(Source: Contributed)