Pipila ka oras sa dili pa ang pagsugat sa tuig 2026, personal nga nanguna sa roving patrol ug inspeksyon ang Officer-in-Charge sa Cebu City Police Office (CCPO), PCOL George V. Ylanan, sa mga kapulisan nga gi-deploy sa Plaza Independencia, ubang mga lugar nga daghang tawo, ug sa mga elevated outposts sa tibuok dakbayan atol sa New Year’s Eve countdown.
Gihimo ang kalihokan aron masuta ang kahimtangan sa kalinaw ug kahapsay samtang nagpadayon ang pagsaulog sa Bag-ong Tuig. Gitutokan sa inspeksyon ang kaandam, kamatngon, ug disiplina sa mga kapulisan, lakip ang pag-check sa attendance, husto nga pagsul-ob sa uniporme, ug pagtuman sa ilang gitakdang pwesto ug buluhaton.
Tumong niini nga masiguro nga andam kaayo ang tanang kapulisan sa pag-atubang sa bisan unsang insidente ug aron makita gyud ang presensya sa pulis sa mga importanteng lugar sa siyudad.
Nagpakita usab kini sa lig-on nga paningkamot sa CCPO sa pagpalig-on sa peace and order sa Cebu City, ilabi na karong holiday season, isip kabahin sa “Ligtas Kapaskuhan” nga programa.
Gipasalig sa CCPO nga magpadayon sila sa paghatag og luwas, malinawon, ug seguradong palibot alang sa tanang residente ug bisita sa dakbayan.
Giawhag usab ang publiko nga makigtambayayong sa kapulisan ug magpabiling alerto samtang ginasugat ang Bag-ong Tuig sa diwa sa kaluwasan, panaghiusa, ug kalinaw.
Source: CCPO
I via Renante Socia Lada