Davao del Norte — Nadiskubrehan na ang patay nga lawas sa 13-anyos nga babaye nga gi-report nga nawagtang ug posibleng nalumos, human kini makit-i nga naglutaw sa Lasang River, dapit sa Purok Gulayan, Barangay Datu Abdul, pasado alas 12:00 sa udto karong Hunyo 15, 2025.
Sumala sa City Information Office (CIO) sa Panabo, gi-report nga missing ang menor de edad niadtong Hunyo 13, hinungdan nga gilusad dayon ang search and retrieval operation sa mga personahe sa Panabo City Disaster Risk Reduction and Management Office (CDRRMO).
Pagkahuman sa duha ka adlaw nga pagpangita, nakaplagan ang biktima nga walay kinabuhi ug giluwas gikan sa tubig. Gidiretso kini sa usa ka punerarya sa Panabo City alang sa pormal nga pag-ila ug pagproseso.
Nagpakabana usab sa operasyon ang mga sakop sa Bureau of Fire Protection (BFP), Philippine Coast Guard, Recon Philippines Pyramid Base, ug uban pang volunteer responders.
Padayon ang pagpahimangno sa katawhan, ilabina sa mga ginikanan, nga bantayan ang ilang mga anak ug malikayan ang samang insidente. (Camille Santos Naraga)(Source: Contributed)