DAVAO CITY – Miapil si Presidente Ferdinand R. Marcos Jr. uban sa ubang mga lider sa Association of Southeast Asian Nations (ASEAN) sa Kuala Lumpur, Malaysia, alang sa Opening Ceremony sa 47th ASEAN Summit and Related Summits. Mainit silang gipangabi-abi ni Malaysian Prime Minister Dato’ Seri Anwar Ibrahim sa pagsugod sa maong pagtigum.
Ang maong summit, nga may tema nga “Inclusivity and Sustainability,” nagtinguha sa pagpalig-on sa kooperasyon ug pagkahiusa sa mga nasud sa Southeast Asia aron atubangon ang mga isyung ekonomiko, pangkalibutanon, ug panlipunan sa rehiyon.
Gimarkahan usab sa maong okasyon ang usa ka makasaysayanong lakang human pirmahan sa mga lider ang Declaration on the Admission of Timor-Leste into ASEAN, nga nagpasabot sa opisyal nga pag-ila sa Timor-Leste isip ika-11 nga miyembro sa organisasyon.
Gipangulohan ni Presidente Marcos Jr. ang delegasyon sa Pilipinas, nga nagpasabot sa padayon nga paningkamot sa nasud nga makiglambigit ug magpasiugda sa kalinaw, kalambuan, ug pagkahiusa sa tibuok rehiyon. .(Camille Santos Naraga)(Source: Contributed)