DAVAO CITY – Nadakpan ang usa ka live-in couple sa Purok 1-A, Biao Joaquin, Calinan District, human masakpan sa gipahigayon nga drug buy-bust operation sa mga operatiba sa Calinan Police Station 10 niadtong udto sa Hunyo 10, 2025.
Sa unang transaksyon, P34,000 ang kantidad sa gituohang shabu nga napalit sa mga pulis gikan sa suspek nga si alyas “Goryo”, 28 anyos, uban ang iyang live-in partner nga si alyas “Aika”, 19 anyos. Ang duha residente sa Montevista, Davao de Oro.
Matod sa report sa kapulisan, nakuhaan pa ang mga suspek og 3 ka dugang sachets nga adunay sulod sa gituohang shabu. Ang kinatibuk-ang kantidad sa nakumpiskang droga gibanabana nga P1,054,000.
Gikumpiska usab sa mga otoridad ang sedan nga gigamit sa mga suspek sa ilang kalihokan.
Gikustodiya na karon sa Calinan Police ang mga nadakpan, samtang gipangandaman na ang pagsaka sa mga kasong may kalabotan sa paglapas sa Republic Act 9165 o ang Comprehensive Dangerous Drugs Act of 2002.(Camille Santos Naraga)(Source: Contributed)