Davao City – Subling gipasidunggan ang Kidapawan City isip Sustainable and Livable City karong tuiga sa 8th Nation Builder and MOSLIV Awards nga gipahigayon sa Okada, Manila, niadtong Marso 21, 2025.
Kini nga dungog gihatag sa Sustainability Standards Inc., ug ang Kidapawan City lamang ang nakadawat niini sa tibuok Visayas-Mindanao area.
Sa usa ka Facebook post, si Kidapawan City Mayor Paolo Evangelista mipasiugda sa importansya sa panaghiusa aron makab-ot ang kalambuan sa syudad. Sumala sa mayor, ang maong pasidungog dili lang bunga sa paningkamot sa usa ka grupo o indibidwal, kondili resulta kini sa kolektibong paningkamot sa mga lungsuranon.
Nahimong Hall of Famer ang Kidapawan City sa maong kategoriya sukad sa tuig 2023 hangtod 2024. Sa kataposan, nagpaabot si Mayor Evangelista sa iyang paglaum nga bisan pa sa nagkalain-laing politikanhong panglantaw, magapadayon ang panaghiusa sa mga Kidapaweños alang sa padayong kalambuan sa ilang dakbayan. (Camille Santos Naraga)
(Source: Contributed)