DAVAO CITY — Napasakaan og kaso ang usa ka manager sa pribadong kompanya human masikop sa checkpoint operation sa Barangay Lacson, Calinan District, Davao City niadtong Hunyo 1.
Giila sa mga awtoridad ang nadakpan sa alyas nga “Lando,” 44 anyos, minyo, ug residente sa Valencia City, Bukidnon.
Atol sa inspeksyon, nakit-an ug narekober gikan sa suspek ang upat ka dagkong transparent sachet nga adunay sulod nga gituohang shabu. Sumala sa kapulisan, ang nakompiskar nga ilegal nga droga adunay gibanabanang kantidad nga ₱131,920 base sa standard drug price.
Ang pagdakop nahimo pinaagi sa hiniusang operasyon sa Armed Forces of the Philippines (AFP), Task Force Davao (TF Davao), ug Philippine National Police (PNP), isip kabahin sa ilang padayong kampanya batok sa ilegal nga droga.
Sa pagkakaron, anaa na sa kustodiya sa kapulisan ang suspek samtang gihikay ang pagsaka sa kasong paglapas sa Republic Act 9165 o Comprehensive Dangerous Drugs Act of 2002.(Camille Santos Naraga)(Source: DCPO)