LUPON, Davao Oriental — Duha ka lalaki ang napasakaan og kaso human masikop sa usa ka buy-bust operation nga gipahigayon sa kapulisan sa Lupon, Davao Oriental niadtong sayong bahin sa buntag sa Hunyo 2.
Ang mga suspetsado, nga giila sa mga alyas nga “Dodong,” 54 anyos, ug “Drake,” 57 anyos, parehong taga-Davao City, nadakpan human makuhaan og kapin 220 gramos sa gidudahang shabu nga adunay gibanabanang kantidad nga ₱1.496 milyon.
Narekober usab sa operasyon ang buy-bust money, usa ka Toyota Hilux, mga cellphone, ug uban pang mga butang nga gituohang may kalabotan sa ilegal nga kalihokan.
Matod sa Lupon Municipal Police Station, padayon na ang pagproseso sa kasong paglapas sa Republic Act 9165 o Comprehensive Dangerous Drugs Act of 2002 batok sa mga nadakpan.
Ang duha ka suspek anaa na karon sa kustodiya sa kapulisan samtang gihulat ang pormal nga pagsang-at sa kaso.(Camille Santos Naraga)(Source: PNP Lupon MPS)