DAVAO DEL NORTE — Natapos ang kapin usa ka bulan nga pagpangita sa kapulisan sa usa ka 33-anyos nga babaye human kini masikop pinaagi sa usa ka Warrant of Arrest sa Barangay Ising, Carmen, Davao del Norte.
Ang suspek, usa ka minyo nga magtutudlo ug residente sa Barangay Cabayangan, Braulio E. Dujali, giakusahan sa paglapas sa Republic Act No. 11199 o ang Social Security Act of 2018.
Base sa report sa kapulisan, ang warrant gi-isyu ni Hon. Chester Chua Castaños sa Regional Trial Court, Branch 34 sa Panabo City niadtong Mayo 8, 2026, ubos sa Criminal Case No. CRC 469-2026. Gitugotan usab sa korte ang piyansa nga nagkantidad og ₱72,000 alang sa iyang temporaryong kagawasan.
Ang pagdakop nahimo pinaagi sa hiniusang operasyon sa Braulio E. Dujali Municipal Police Station ug mga sakop sa Provincial ug Regional Mobile Force units sa Police Regional Office 11.
Human sa operasyon, gipahibalo sa suspek ang iyang mga katungod ug gidala ngadto sa Carmen Municipal Police Station diin siya karon gitipigan alang sa hustong dokumentasyon ug legal nga proseso.(Camille Santos Naraga)(Source: Braulio E. Dujali Municipal Police Station)