DAVAO CITY – Gipatawag ni Island Garden City of Samal (IGACOS) Mayor Lemuel “Toto” Reyes ang 16-anyos nga lalaki uban sa iyang pamilya human mogawas sa social media ang usa ka video nga nagpakita sa paggamit niya og dili maayong mga pulong kontra sa usa ka foreign national nga vlogger.
Sa maong panagpulong, personal nga nangayo og pasaylo ang menor de edad sa langyaw nga naapektuhan sa iyang gibuhat. Gipahimangnuan siya ni Mayor Reyes nga himoon kini nga leksyon ug likayan ang susamang mga aksyon sa umaabot.
Lakip sa intervention program nga ipatuman sa LGU mao ang pagpaubos kaniya sa spiritual counseling ug ang pagserbisyo og tulo ka bulan nga community service sa iyang barangay. (Camille Santos Naraga)(Source: Contributed)