Arestado ang usa ka High Value Individual (HVI) human masikop sa buy-bust operation nga gilusad sa kapulisan sa Barangay San Miguel, Tagum City alas 3:21 sa kadlawon niadtong Mayo 25, 2026.
Ang operasyon gipahigayon sa Tagum City Police Station uban sa tabang sa DNPIU, DNPDEU, ug 1st DNPMFC.
Giila ang nadakpan sa alyas “Glen,” 43 anyos, adunay live-in partner ug residente sa maong lugar.
Base sa report, nakapalit ang poseur-buyer og usa ka heat-sealed transparent plastic sachet nga adunay sulod nga gituohang shabu gamit ang marked money nga naglangkob sa usa ka ₱500 bill ug siyam ka peke nga ₱1,000 bills.
Narekober usab gikan sa suspek ang upat pa ka sachets sa gituohang shabu, usa ka rubber medical glove, ug usa ka puti nga Honda ADV160 nga giingong gigamit sa ilegal nga transaksyon.
Ang kinatibuk-ang gibana-banang kantidad sa nakumpiskang droga mikabat og ₱340,000 ug adunay gibug-aton nga kapin 50 gramos base sa standard drug price.
Sa kasamtangan, anaa na sa kustodiya sa Tagum City Police Station ang suspek ug mag-atubang og kaso sa paglapas sa Sections 5 ug 11, Article II sa RA 9165 o Comprehensive Dangerous Drugs Act of 2002.(Camille Santos Naraga)(Source: Contributed)