Duha ka Regional Top Priority Illegal Drug Personalities ang nasikop sa managlahing buy-bust operations nga gilusad sa Police Regional Office 11 (PRO 11) sa Davao Oriental ug Davao de Oro niadtong Hulyo 17, 2026.
Base sa report sa PRO 11, nakumpiska sa mga operatiba ang gituohang shabu nga adunay kinatibuk-ang Standard Drug Price (SDP) nga ₱748,000, lakip ang duha ka armas, mga bala, buy-bust money, drug paraphernalia, kwarta nga gituohang halin sa ilegal nga droga, ug uban pang mga ebidensya.
Sa operasyon sa Barangay Corporacion, Lupon, Davao Oriental, nadakpan si alyas “Romy,” diin narekober gikan kaniya ang gituohang shabu nga nagkantidad og ₱510,000, usa ka .38 caliber revolver nga adunay unom ka buhing bala, ug uban pang mga ebidensya.
Samtang sa operasyon sa Barangay Kingking, Pantukan, Davao de Oro, nasikop usab si alyas “Ron.” Nakuha gikan kaniya ang gituohang shabu nga adunay kantidad nga ₱238,000, usa ka .45 caliber pistol nga adunay tulo ka buhing bala, cellphone, cash, buy-bust money, drug paraphernalia, ug uban pang mga ebidensya.
Ang duha ka operasyon gipahigayon sa mga operatiba sa Regional Police Drug Enforcement Unit 11 (RPDEU 11) sa koordinasyon sa lokal nga kapulisan ug Philippine Drug Enforcement Agency (PDEA) XI.
Giandam na sa mga otoridad ang kasong paglapas sa Republic Act 9165 o Comprehensive Dangerous Drugs Act of 2002 ug Republic Act 10591 o Comprehensive Firearms and Ammunition Regulation Act batok sa duha ka suspetsado.(Camille Santos Naraga)(Source: PRO 11)