Usa ka 27 anyos nga babaye ang namatay human makuryentihan samtang nanginhas og sisi duol sa usa ka fishpond sa Purok Lagaw, Barangay Tajao, Pinamungajan, Cebu, alas 7:00 sa buntag niadtong Hulyo 15, 2026.
Ang biktima giila nga si Jenelyn Tejana Donal, residente sa maong barangay ug inahan sa usa ka anak. Base sa imbestigasyon sa kapulisan, naglakaw siya padulong sa fishpond aron manginhas sa dihang aksidente siyang nakabangga sa usa ka konkretong poste sa kuryente nga mitakilid.
Tungod sa insidente, natumba ang biktima ug natandog sa buhing linya sa kuryente nga maoy hinungdan sa iyang kamatayon. Miresponde dayon ang Pinamungajan Municipal Police Station human makadawat og report gikan sa CEBECO III, ug gipahunong usab ang suplay sa kuryente aron masiguro ang kaluwasan sa mga responder ug mga residente.
Sa dugang imbestigasyon, nasayran nga mitakilid ang poste tungod sa kahumok sa yuta diin kini gitukod, hinungdan nga niubos ang mga linya sa kuryente ug nahimong peligro sa mga moagi.
Gi-awhag karon ang CEBECO III sa pag-ayo dayon sa mga guba nga poste aron malikayan ang susamang aksidente.
I via Renante Socia Lada