Usa ka gituohang High-Value Individual (HVI) ang nadakpan sa mga operatiba sa kapulisan atol sa buy-bust operation nga gipahigayon sa Purok 25, Teacher’s Village, Barangay Calinan Poblacion, Calinan District, Davao City niadtong gabii sa Hulyo 16.
Base sa report, nakumpiska gikan sa suspetsado ang gibanabanang 14.66 ka gramo sa gituohang shabu nga adunay Standard Drug Price (SDP) nga ₱99,688.
Ang operasyon gilusad pasado alas 10:04 sa gabii sa pagpanguna sa mga operatiba sa Police Station 15, uban sa mga sakop sa 1st ug 2nd City Mobile Force Company (CMFC) ug sa koordinasyon sa Philippine Drug Enforcement Agency (PDEA) Region XI.
Gipasiugda ni DCPO City Director PCOL Peter Bauzon Madria nga magpadayon ang Davao City Police Office sa pagpatuman sa intelligence-driven anti-illegal drug operations aron mapugngan ang ilegal nga droga ug mapalig-on ang kalinaw ug kahapsay sa siyudad.
Ania na karon sa kustodiya sa kapulisan ang suspetsado samtang gipadayon ang imbestigasyon ug giandam ang kasong paglapas sa Republic Act 9165 o ang Comprehensive Dangerous Drugs Act of 2002.(Camille Santos Naraga)(Source: DCPO)