DAVAO CITY – Gipalig-on sa Davao City Police Office (DCPO), Task Force Davao, ug City Security Unit ang siguridad sa Davao City Overland Transport Terminal (DCOTT) niadtong Lunes, Oktubre 27, 2025, aron masiguro ang kaluwasan ug kahapsay sa pagbiyahe sa mga pasahero atol sa Undas 2025.
Sumala sa mga otoridad, gipahugtan ang pagbantay ug inspeksyon sa terminal, lakip na ang pagsusi sa mga bagahe, paggamit sa K9 units, ug pagpatuman sa random checkpoints, aron malikayan ang bisan unsang hulga sa kalinaw ug seguridad.
Gilauman nga moabot sa 80,000 ka pasahero matag adlaw ang molarga ug mopauli sa Davao City sa panahon sa All Saints’ Day (Nobyembre 1) ug All Souls’ Day (Nobyembre 2). Ang pagtaas sa ihap sa mga biyahero nag-aghat sa LGU ug kapulisan nga magpahigayon og 24-oras nga pagbantay aron masiguro nga malinawon ug organisado ang pagdagan sa transportasyon.
Gipahimangnoan usab sa Task Force Davao ang publiko nga magpuyo sa disiplina, magmatngon sa ilang mga gamit, ug magreport dayon sa mga otoridad kung adunay makita nga kadudahan nga butang o tawo.
Sumala sa DCPO, padayon ang ilang koordinasyon uban sa terminal management, Land Transportation Franchising and Regulatory Board (LTFRB), ug mga bus operators aron mapadali ang biyahe ug malikayan ang dagkong kumpol sa pasahero.
Ang Davao City Government nagpahinumdom usab sa tanan nga mag-una sa kaluwasan ug pag-ampo sa pagsaulog sa Undas, samtang ang mga otoridad nagpasalig sa padayon nga presensya sa kapulisan ug militar aron mapreserbar ang kalinaw sa siyudad. .(Camille Santos Naraga)(Source: Contributed)